Jerusalem-a bus dinna hmunah bomb puak

Israel khawpui, Jerusalem-a Bus dinna hmuna bomb puakah mi 1 a thi a, mi dang 30 an hliam. Israel hi kum 2000 atanga 2004 inkar khan Palestinian hel, Hamas hoin tum tam tak bei mah se, tun hnai kum engemawzat chhung hian he khawpuiah pawh hian pawi khawihna a thleng tawh lo a, tun tuma bomb puahna hmun pawh hi khawpui thlang lam, boruak muanawm berna hmun a ni a, he bomb puak hian a bul hnaia in tam tak pawh a sawi

MLA hlawh chungchanga rawtna

Mizoram sorkar-in MLA-te hlawh leh hamthatna hrang hrangte zir chianga rawtna siam tura a ruat, Expert Committee Chairman, Assembly Speaker hlui, Pu Rokamlova chuan MLA-te hlawh chu Governor hlawh aia hniam, Chief Secretary aia sanga dah turin an rawt tih a sawi. Vawiina a chenna Ina kan Corr.-in a kawmna-ah Pu Rokamlova chuan, MLA-te hi mipuite chhiahhlawh ni lovin, mipuite aiawhtu an nih avangin an dinhmun a hniam thei lo a ni a ti a, an hlawh chungchanga rawtna hi sorkar-a mi pawimawhte lal dan indawt dan en chunga siam a nih thu leh, an dinhmun dik tak an chelh theih nan leh mipui lalna ram dik tak din a nih theih nan rawtna hi an siam niin a sawi bawk. Pu Rokamlova chuan, sorkar hnathawkte chu hlawha inchhut lui tlat, an hmuh tur ang hmu lova inhriat avanga lungawi loh ching, aia sangte um an nih avangin MLA-te chu an dinhmun siam that ve a ngai a ni a ti a, ram danpuiin Legislator-te chu an hlawh siam a phalsak a, mipui aiawhte chu roreltu an nih theih lehzual nan an dinhmun tihsan ve deuh a ni a ti a, mahse an Committee chu rawttu chauh a ni thu leh, an rawtna chu sorkarin a pawm leh a la ngai a ni tih sawiin, hei hi sorkar hnathawkte khum tumna ni lovin, thuneitu tur, mipuite’n an zah turte siam rem nana ti an ni tih a sawi bawk. Puan tawh angin Expert Committee hian an report leh rawtnate chu thla hlui ni 29 khan Assembly Speaker, General Puposes Committee Chairman ni bawk, Pu R.Romawia hnenah an thehlut a, Expert Committee hian MLA, Speaker, Deputy Speaker, Opposition Leader, Minister, Government Chief Whip leh Deputy Chief Whip-te hlawh tur leh hamthatna dawn tur hrang hrangte uluk takin an zir chiang a, an rawtnate hi Mizoram Legislative Assembly-a General Purposes Committee-in a ngaihtuah leh ang a, pawm tlaka a ngaih chuan Assembly-ah pharh a ni dawn a ni.

Aizawl Lammuala phaitual hnim siam chawp phah tur chu nizan khan Aizawl rawn phurh thlen a ni. Puan tawh angin Lammuala phaitual hnim phah hi kum hlui chhunga thawh zawh hman tura tih a ni na a, a phah tur ber hi USA atanga chah a nih bakah Kolkata-a Customs Office-ah a tan rei tak deuh avangin phah zawh hman a ni ta lova, tukin khanLammualah phurh thlen a, hlan thlak a ni ta a, Sports Minister, Pu Zodintluanga’n a enpui a ni. Artificial Grass chunga phul tur, Silica Sand pawh Lammualah hian a thleng vek tawh a, hemi ruala phul tur tho, Granulated Rubber pawh Artificial Grass rual hian a lo thleng a, rei lote chhungin a phahna tur khawl pawh a lo thlen beisei a ni a, hna pawh tan chhunzawm nghal tum a ni. Lammual hi tun thla ni 26-a Republic Day lawmna tur a ni a, hemi chungchangah hian Sports Minister, Pu Zodintluanga chuan, Contractor-te’n Republic Day hma-a zawh hman an inbeisei chuan Turf hi phah nghal a ni ang a, an zawh hman dawn loh chuan Republic Day hnu-ah phah a nih tur thu a sawi.

Thubuai 248 ziak lut

Kumin October thla chhung khan Police-ten Zoram puma Thana hrang hrangah pawi khawihna thubuai 248 an ziak lut. Hei hi DIG Northern Range, Pu L. Hrangnawna hova vawiina Crime Review Meeting neihah tarlan a ni a, District hrang hrang zingah Aizawl District-ah pawi khawihna chhinchhiah a tam ber a, 145 a ni a, a dawttu Lunglei District-in thubuai 28 a nei a, 3-na, Champhai District-in 21, Kolasib District-in 17, Lawngtlai District-in 16 a nei a, a tlemna ber, Mamit District-ah chuan pawi khawihna thubuai 6 ziah luh a ni. Hemi chhunga thubuai ziah luh a tamna chhan hi Police leh tlawmngai pawlte thawhhona that vang a ni a, ruihhlo zuar leh zu zuar thahnem tak an man a ni. He crime review meeting-ah hian District hrang hrang SP, Battallion Commandant leh Unit hrang hrang SP-te an tel a, kumin Krismas leh Kumthar hman chhunga nunphung ralmuang tak a awm theih nan tan la turin an inchah nghal a ni.

Central Vigilance Commissioner, PJ Thomas eiruk vangin

Central Vigilance Commissioner (CVC), PJ Thomas chu eiruk thubuai nei tawh a nih avanga a hna chelh tlak loa ngaituten Supreme Court-ah PIL an theh luh avangin a ban rin a ni. Kum 60 mi, PJ Thomas hi Telecom Secretary hlui a ni a, eiruk thubuai chhuinaa hna sang ber thawk tur hian PM, Manmohan Singh-a kaihhruai, member 3 awmna Committee chuan thla 3 kal ta khan a ruat a, Kerala sawrkar hnuaia a thawh lai, kum 1991 khan ei ruknaah a lo inhnamhnawih tawh nia sawi a ni. Ani erawh chuan PIL thehluh-ah hian thiam lohna engmah a neih loh thu leh a hna hi a chelh chhunzawm zel tur thu a sawi a, tun hnaia sawi hlawh tak, 2G Spectrum lilam dan chhuina-ah Pu Thomas-a hian CBI a pui tha lo niin Court sang ber hian a lo sawi tawh bawk avangin, hetianga hming hliauna nei reng chung chuan a hna hi a chelh reng a rinawm lo niin NDTV chuan a sawi a, ei ru-a puh a nihnaah hian Kerala-a IAS officer inzawm khawm pawlte chu a lam-ah tangin, Pu Thomas-a hi mi tha tak, a hnaa mi inpe leh hminghliauna engmah nei lo niin an sawi a ni.