CHIEF MINISTER IN NE CAREER & SKILLS EXPO - 2012 A HAWNG

Ni 3 chhung awh tur, India Hmarchhaka a hmasa ber, Confederation of Indian Industry (CII) leh Mizoram sorkar Education Department, Development of North Eastern Region(DONER) leh National Skills Development Corporation(NSDC) te tangkawpin an buatsaih, Oil India Limited in a a bultum, North East Career & Skills Expo 2012 chu vawiin khan Aijal Club-ah Chief Minister Pu Lal

Thanhawla chuan a hawng a; Assembly Annexe hnuaia Exposition neihna hmun a fang bawk.

Hawnna thuchah sawiin Chief Minister chuan sorkar-in 12th Five Year Plan a hman tan dawn taka hetiang Expo buatsaih ani chu a inhmeh hle a ni ati a. Khawvelah hmasawnna lamin tlakhniam lam a pan chungin, India chu thalai ngah ber anih avangin ram zawng zawngin an thlir a ni a ti a. Heng thalai rualte hi mumal taka training pek leh thiamna chhersak an ngai a, an hmalam hun tur thlir sak chunga kawng kawhhmuh a pawimawh a ni a ti. Chumi atana National Skill Development Fundah kum 2012 - 2013 chhung atan sum Rs. 1000 crore dah a ni chu a lawmawm hle a, hei hian thalaite tan thiamna leh eizawnna nghet a siam sak ngei a beisei awm a ni a ti. Hmarchhak bik tan Handloom Sector tih chak tum a nih bawk thu a sawi bawk.

Kan thenawm ram Myammar chu Democracy ram ni tura a inkau tan avangin ram tam tak ngaihven a hlawh tan thu sawiin, Chief Minister chuan Look East Policy denchhenin tunah hian India sorkarin Kaladan Multi Modal Transport Project hnuaiah inkalpawhna kawngpui Lawngtlai atanga Sittwe Lawngchawlhna pawh tur a sial mek a ni a ti a. He Project hian India Hmarchhak state, abikin Mizoram chuan hamthatna tam tak a neih ngei a beisei awm a ni a ti a. Kan ramri a Land Custom Stations te pawh ala pawimawh hle dawn a ni a ti.

Chief Minister chuan tunhma anga College Degree neiha sorkar hna awlsam taka an hmuh thin kha, tunah chuan a theih tawh loh thu sawiin, tunah chuan chhawr tlak ni turin thiamna ziktluak - professional skills neih angai tawh a ni a ti a. Hemi lama kawng min kawhhmuh turin NSDC hi a pawimawh a, sorkar chu remchanna lo siam tu a ni thei a ni a ti.

Chief Minister chuan he Expo, ni 3 chhung lek awh tur hian thalaite tan chona siam saktu anih ngei a beisei thu sawiin, hlawhtlinna an hmuh ngei theihna turin duhsakna a hlan a ni.

NE Career and Skills Expo 2012 in a tum ber chu school leh college zirlai ten an tuina mila, thiamna chherchhuak tura kawng hrang hrang lo kawhhmuh a ni a. Hemi atan hian India khawpui 20 chuang atangin pawl - organisation hrang hrang 30 vel an lo tel a. Chung zinga thenkhatte chu Apparel Training & Design Centre(Gurgaon), Asian Institute of Gaming and Animation(Bangalore), British Council (Kolakata), IIE (Guwahati), LIQVID (Noida), NIFT(Delhi), USIEF (Kolkata), ZIVA SPA (Indore), Global Talent Track (Pune) etc te an rawn tel a ni.

Hawnna inkhawmah hian Pu Lalsawta, Minister for Education chu khualzahawm a ni a, Pu Lalrinliana Sailo, Minister for Trade & Commerce pawhin thu a sawi bawk. Anni bakah hian Lt Col ZS Zuala leh Pu Siamkunga, MLA te an tel bawk a. CII lam atangin Abhijit Barooah, Co-Chair - CII North East Council, Ranjan Choudhury, Principal-Programme Development, NSDC ten thu an sawi bawk a ni.