Tun kar thil thleng

Environment & Forest Department-a Forest Guard tura lak tawh, a hnua an hnâwl leh tak, K Biakmuana, Teikhang khua chu a hna dil dik tak, Forest Guard-ah lak a ni leh si dawn. K Biakmuana chungthu-ah hian MZP hruaitute chuan thla hlui 30 khan Environment & Forest Minister, Pu H Rohluna chu a office-ah hmuin, thil awmdan an sawipui a, hemi hnu hian K Biakmuana hi Forest Guard-a dah leh remtih a ni. MZP chuan, K Biakmuana, a phû ang ngeia Forest Guard-a lâk a ni tur chu lawmawm an tih thu an an sawi a ni. Puan tawh angin, K Biakmuana hi a tirah Forest Guard tur lakah a tling anga tarlan a ni a, a hnuah a aiah Rebecca Hmingchungnungi, Ramthar Veng, Aizawl chu lâk leh a ni. Zirlai pawlte’n K Biakmuana hi a
tlinna ngeiah dah tura thuneitute an nawr hnuah, MR-a thawk tura lâk tura tih an ni a, MZP-te’n Minister an sawipui leh hnuah, a hna dil leh a tlinna ngeiah lak tura tih a ni leh ta a ni.

Hetih lai hian, Rebecca Hmingchungnungi pawh Forest Guard atan hian lâk tlang an tum tho nia thu dawn a ni bawk.

-------------------------

Ivory Coast President, Laurent Gbagbo-a rorelna paih thlak tumtu eptuten President chenna hmun leh sawrkar hmun pawimawh ralthuamin an bei. Ivory Coast tualchhung buaina tihreh tum hian President Laurent Gbagbo chuan inkahhai puang tawh mahse, President thar atana thlan tlin, Alassane Ouattara-a lamtang eptute phut anga tun thlenga President a la ban duh loh avangin, eptute hian sawrkar an bei zui zel a, an ramchhung hmun tam tak an thuhnuaia an dah hnuah, nizan atang khan an ram khawpui Abidjan-a President chenna hmun leh sawrkar enkawl, TV Station-te chu eptute hian an bei tan a ni. Eptute hian an khawpui an luhchilh tawh avang hian President Gbagbo-a dinhmun hi a derthawng hle tawh niin BBC chuan a sawi a, heti chung hian eptute hnena inpek tumna emaw, President a nihna bansan emaw chu a la tum chuang lo ni a hriat a ni a, eptuten ralthuama an beih mek, Abidjan khawpui pawn, tuipui kama a chenna thin hmunah hian a awm em tih pawh hriat chian a ni lo a, he in hi sawrkar sipaiten veng mahse, eptute hian an hnehchhuh mai rin a ni. Ivory Coast tualchhung buaina vang hian ramri-te chu khar ni tawh mahse, UN leh France muanna sipaite chuan, an khawpui Abidjan a International airport chu an thuhnuaiah an dah a, an rama UN hotu, Choi Young-jin chuan tun dinhmunah President Gbagbo-a sipai 50,000 pawhin President an thlawpna an hnuhdawh tawh avangin, President hi Republican Guard leh amah vengtu tlem te chauhin an veng tawh niin a sawi a, hetianga eptuten an beih zui zel chuan a nunna atan pawh a hlauhthawnawm dawn ni a hriat ni mahse, Alassane Ouattara-a lamtangte chuan an President ni lai hi kut thlak an tum loh thu leh mana, International Criminal Court kuta hlan an tum thu an sawi a ni.