Lawr khawm

Assam tuilian ziaawm rih lo

Ruah sur nasa vanga Assam a tuilian chuan ziaawm lam a pan thei lo a, hriat theih chinah mi 75,000-in an chenna hmun chhuahsanin hmun him an pan tawh. Sorkar thupuangtu chuan, ruah sur nasa vang hian, Lakhimpur, Dhemaji, Sonitpur leh Jorhat District-a khaw 800 vel chu tui-in a chim tawh niin a sawi a, harsatna tawkte chhawmdawl tur hian an mamawh bungrua pe tur leh damdawi lam thiamte pawh tuilenna hmunah hian tirh an ni tawh niin a sawi.

Central Water Commission chuan, fur ruah tui tla nasa vanga Brahmaputra lui lian chuan hmun 8 laiah hlauhawm chin chhinchhiahna a pel tawh niin a sawi a, tuilian vanga harsatna tawk, an chenna In chhuahsan-te hi rel kawng leh sorkar sikul bakah sorkar pisa-ah te an riak tih an sawi. Ruah sur nasa vanga tuilian tuar tam tak an awm lai hian, hmun tam takah leimin vanga harsatna tawk an awm bawk a, Assam khawchhak lama National Highway 52-ah pawh leimin vangin lirthei tam tak an tang a, ramsa humhalhna hmun, Kaziranga National Park pawh tuiin a chim tan avangin, ramsa-te pawh hmun hima dah dan tur zawn mek an ni.
---------------------------------------------------------
Karnataka a political party thenkhatte Lokayukta vangin talbuai

Karnataka Lokayukta, Justice Santosh Hegde-a’n Karnataka state chhunga dan lova thil laihchhuahna hmun neite chungchang a chhuina report, sorkar laipuia thehluh a tum avangin Politician tam tak an talbuai. Eirukna chhui tu, Justice Santosh Hegde-a’n a report thehluh tura thil dik lo ti a sawi zingah hian Politician lar tak tak leh, BJP hruaitute bakah Minister ni lai hmingte pawh a lang ni-a hriat a ni a, heng zingah hian an state Chief Minister,
Yeddyurappa-a hming pawh tarlan ni-a hriat a nih avangin, mi thenkhat chuan, Justice Hegde hi hmuin a report thehluh tur atanga CM hming paih turin an ngen ni-a hriat a ni. Justice Santosh Hegde chuan, dan lova thil laihchhuahna hmun neih chungchang a chhuina report a siamah hian, thir laihchhuahna hmun chungchangte pawh a tel niin a sawi a, thil laihchhuahna hmun hi sorkarin inkaihhruaina dan a siam zulzuia siam a nih loh chuan a bula chengte tana hlauhawm thei thil a ni tih sawiin, hetianga dan loa thil tite a chhuina chhan pawh mihringte himna a ngaihtuah vang niin a sawi.

---------------------------------------------------------

President, Alpha Conde-a chenna in beih a ni

Guinea khawpui, Conakry-a an ram President, Alpha Conde-a chenna in chu misual tu tih hriat lohten an bei a, sipaiten an beih let naah mi 1 a thi. Sipai chakna hmanga an rama roreltute paihthlak an nih hnuah President, Alpha Conde hian kum 2008 atang khan President hna hi a chelh tan a, a chenna in beitute hi eng pawl mi nge an nih hriat an la ni lo a ni. Misual rual hian President chenna in hi an pawngkah hnu-ah sipaiten an bei let a, darkar 2 chuang an inkah hnu-ah misual ho hi an tawlh kir chauh a, khawpui chhungah zawn zui nghal an ni.