Socio-Economic & Caste Census, 2011 chu Mizoram pum huapin nakum, January ni 15-ah tan a ni dawn. Mizoram sorkar leh he chhiarpuia hnathawktute kaihruaitu tur, Electronics Corporation of India Ltd. (ECIL) chuan chhiarpui tan ni atan hian January ni 15 an ruat a, tunah hian ngawrh taka inbuatsaih chhoh mek a ni a, he chhiarpui buaipuitu tur, Vendor atana thlan, Electronics Corporation of India Ltd. chuan hmanrua tur, Tablet PC te a supply mek a ni. He company hian Kolkata-a Firm pakhat, In Media Computer Service ruaiin thingtlang hmun hrang hranga
chhiarpui hnathawktu tur mi 800 vel, Mizoram atangin an la dawn a, heng mite hi tun thla chhung ngeia lak fel a, training pawh pek thuai tum a ni.
He chhiarpuiah hian Rural Development Department-in thingtlang khua zawng zawng a tum ang a, UD&PA Department-in khawpuia ngaih chin, khaw 23 a tum ve thung dawn a, Mizoram hmun hrang hrangah hnathawhna tur hmun, Charge Centre 65 dah a ni ang a, heng zinga 26 chu Rural Development Department chan hnuaiah a awm ang a, 39 chu Urban Area huam chhungah dah a ni ang. Heng Charge Centre-a hman atan hian Computer, Printer leh hmanraw dangte chu ECIL hian a supply mek a ni. Puan tawh angin Mizoram pum huapa he chhiarpui atana Nodal Department chu GAD a ni a, Nodal Officer chu Pu V. Lalremthanga, Additional Secretary a ni.
No comments:
Post a Comment