Chanchinthar lawrkhawm

Zoram pum huapa Socio Economic and Caste Census neih hun tur chu nakkum January ni 16 leh March ni 31 inkar atan sawn hlat a ni. He census-a Nodal Department, Rural Development Department hotute hnen atanga thu dawn danin inbuatsaihna hi thui tak kalpui a ni tawh a, Charge Officer tur leh Master Trainer turte chu training pek zawh tawh a ni a, Master Trainer-te hian anmahni bial chhung theuhah Supervisor atanga Data Entry Operator thlengin training an pe thuai dawn a ni. Charge Officer te leh Master Trainer-te training hnuhnung ber chu nimin khan Lungleia DC Conference Hall-ah zawh a ni a, hetah hian Lunglei Bawrhsap, Pu V. Sapchhunga chuan sorkar atanga tanpuina leh therhlo beisei avangin chhungkaw engemaw zat chuan BPL-a
indah an pawisa lova, hetiang rilru dik lo neih hi a pawi takzet a ni a ti a, he chhiarpuia hnathawktu turte chu chhungkaw hrang hrang dinhmun dik tak chhinchhiah tura fimkhur taka hna thawk turin a chah a ni.  Training-ah hian Charge Officer tur leh Master Trainer tur BDO te, APO, DRDA-a Addl. PO te, College Lecturer te leh High School zirtirtute an tel a, Rural Development Department-a Joint Director, Pi Ramdinliani’n a kaihruai a ni.
__________________

Tunlai hian Saihaah eirawngbawlna gas a harsa hle nia sawi a ni. Saihaa kan Corr. sawi danin, gas phur motor thleng hnuhnung ber chuan Inrinni kal ta khan Saiha a lut a, a gas phurh hi rang taka sem zawh nghal a ni a, hemi hma thla hnih-thla thum chhung, gas mamawh ang an hmuh tawh loh avangin mipuite chawmna khawp gas hmuh theih a ni lo a ni. Saiha hi Mizofed chawm a ni a, tuna harsatna thleng chungchanga kan Corr. zawhna chhangin Mizofed Divisional Manager, Pu Rothuama Colney chuan gas harsat chhan hi thil thar ni lovin, kumin October thlaa Puja hman hnu khan supply a la inman pha tawk lo niin a sawi a, Puja hnu lawk khan New Bongaigaon-a gas thunna chu tihfai a tul avangin hun rei lote khar a ni a, hemi hnu hian gas phurtu driver-te engemaw chen an nuar bawk a ni. Hengte avang hian Mualkhanga Bolting Plant-ah gas phurh luh a tam tawk lova,  Saiha chang ni lo, District khawpui dang zawng pawhin harsatna hi an tawk mek niin a sawi. He harsatna su kiang tura tuna thil tih theih awm chhun chu sorkar laipuia thuneitu sang hnena thlen niin Mizofed hotute chuan an sawi a, Mizoram sorkar hotuten hemi kawngah hian chak zawka tan an lak a ngai niin an sawi bawk. Hetih lai hian Biakkungi gas Agent Manager, Pu Zosanga chuan kumin October atanga December thla thlengin gas an hmuh dan chu a pangngai niin a sawi ve thung a, nikum December nena khaikhin pawhin an hmuh zat a tlem chuang lo niin a sawi bawk.
———-

Mara Autonomous District Council Office chu Krisman leh Kumthar chawlh hmang turin naktuk atangin khar a ni ang a, nakkum January ni 4-ah hawn leh a ni ang. MADC Chief Executive Member, Pu S. Khipo hnen atanga kan Corr. thu dawn danin, MADC Office-a Executive Member-te chu vawiin chawhnu khan CEM chuan a ko khawm a, kumtluana Pathian hruaina an dawn avanga lawmthu sawina inkhawm an hmang a ni. Hemi bakah hian Department hrang hranga thawkte pawhin anmahni hotu, Executive Member leh Officer te nen vawiin chawhnu khan inkhawm an nei a, Krismas leh kumthar atan duhsakna an inhlan tawn a ni.
———–

Champhai bula Hmunhmeltha-a tawngtaina in, Assam Type-a sak chu vawiin khan Agriculture Secretary, Pu TV Fambola’n a hawng. He tawngtaina in hi pawl bik awm lo, Tawngtai Committee-in an sak a ni a, hawnna inkhawm hi tawngtai Committee Chairman, Pu TBC Rotluanga’n a kaihruai a, hawn a nih hnu hian he inah hian an tawngtai rual a, hlim takin Pathian fakin an zai a ni.
———–

The Writers’ Club chuan Krismas thilpek atan vawiin khan Central Jail-ah lehkhabu chi hrang hrang 2,453 an pe. Heng lehkhabu te hi Rs.67,472/- man vel a ni a, The Writers’ Club President, Lalhmachhuana Zofa-in Central Jail Special Superintendent, Pu K. Lawmthanga hnenah a hlan a ni…………. Hlanna inkhawmah hian Jail tangte pawh an tel a,  Lalhmachhuana Zofa chuan, Khawvel huap lehkhabu lar tak takte hi a ziaktuten Jail-a an tan laia an ziah a awm nual niin a sawi a, an thilpek chu mi tangten an chhawr tangkai ngei a beisei thu a sawi bawk. He inkhawmah hian Prison Department aiawhin Special Superintendent, Pu K. Lawmthanga pawhin lawmthu a sawi a ni.
———

Aizawl Civil Hospital-a hman atan vawiin khan mi thahnemngaite’n Krismas thilpek atan thisen unit 31 an pe a, thisen petute hi mipa 29 leh hmeichhia 2 an ni a, Civi Hospital Blood Bank-a kalin thisen hi an pe a ni. Aizawl Civil Hospital hian tun thla ni 19 atang khan Krismas thilpek atan mi thahnemngaite atangin thisen unit 71 an dawng tawh a ni.
————-

Krismas thilpek atan puan thui thiam, Pu RC Khuma nupui, Pi Kapthiangi chuan nizan khan Chanmari venga Silver Moon Restaurant-ah mitdelte ruai a thehsak. Hei hi Mizoram Blind Care Society-in an tawiawm a, he ruai thehnaa kal thei ve lote chu Mizoram Blind Care Society Chairman, KT Hmar leh Adviser Pu RC Thanga ten an chenna inah zawng chhuakin thilpek an hlan a ni.
———

Sericulture Department Website thar, www.serimizoram.co.in chu Sericulture Secretary, Pu C. Lalthankhuma’n vawiin khan a hawng…… ….. Thu sawiin Pu C. Lalthankhuma chuan, hun rei lote chhungin Sericulture Department-ah hmasawnna lawmawm tak hmuh tur a awm niin a sawi a, Director, Pu Donatus Engzananga pawhin, an Department buaipuia tun hnaia Hmangaihna Eng film leh Zozia Silk Fashion Show buatsaihte chu hmasawnna ropui tak niin a sawi a ni.