General VK Singh-a kum chungchanga buaina-ah sawrkar-in mawhphurhna engmah a nei lo

Defence Minister, AK Antony-a’n khawmual sipai hotu lu, General VK Singh-a kum chungchanga buaina-ah sawrkar-in mawhphurhna engmah a nei lo niin a sawi. He thu hi vawiin khan Delhi-ah thuthar lakhawmtute hrilhin, Defence Minister chuan, General VK Singh-a pian kum chungchanga buaina awm mek hi, sipaia pawl 2-ten kum  36 chhung record an vawn dan a inan loh avanga intan a nih thu a sawi a, kum 2006-a sipai hmunpuiin an hriat chhuah hnu-ah pawh tihdik tumna a awm loh bakah sawrkar pawh an rawn lo a, tuna taka sawrkar

leh sipai inkara  buaina anga sawi leh chu thil dik lo nia sawiin, sawrkarin inrawlhna tur engmah a nei lo niin a sawi a ni. Defence Minister hian kum 2006 atanga 2009 chhung khan Army Headquarters (AHQ) chuan kum chungchanga buaina hi an kut ken vek a, an rawtnate chu sawrkar pawhin a pawm mai thin niin a sawi a, kum 2011-a buaina lo lang leh hi chu Law Ministry leh Attorney General kutah dah a ni tih sawiin, tunah  Supreme Court-a insawifiah ngai hiala sawrkar a awm ta chu thil tha lo tak nia a hriat thu leh he thu-ah hian Court sang ber thutlukna chu pawm mai a nih tur thu a sawi a ni. Puan tawh angin, General VK Singh hian kum 1951-a piang niin a insawi a, hei hi sawrkara a luh hlima chhinchhiah dan pawh a ni na-in, record pakhatah kum 1950-a piang nia a lo inziah avangin kumin-ah hian a chawlh a ngai tawh dawn a, kum 1951-a piang nia ziah hi pawm a nih erawh chuan kum 1 dang a la thawk zui leh thei dawn a ni.