Taxi driver thattu, Laltanpuia dam chhung Lung In tang turin ti

Nikum December 8 zan atanga a taxi khalh lai nena chin hriat loha bo, Chawnghmingthanga (35), s/o. Runkhawia, Bungkawn Veng chu nimin zing khan Sihhmui leh Lengpui inkar kawngpui thlangah hmuh a ni. Chawnghmingthanga hi a bo zan hian Laltanpuia (23) s/o. Lalnuntluanga, Salem Veng-in a that a, Laltanpuia hi January 11, Thawhtanni khan police-te'n an man.

Laltanpuia'n Chawnghmingthanga a thah dan police hnena a puan dan chuan, December 8, 2009 zan dar 10 velah Mission Venga Synod Office bulah

Chawnghmingthanga taxi khalh, MZ-01 D-7299 (Remruatdika, Bungkawn ta) chu phar dingin, Rangvamualah a kalpui a, Lalnuntharite inah zu Rs. 150 man lain, Rangvamuala leivungin kawngpui a hnawh thinna bulah an indun a ni.

Zu an in zawhah Chawnghmingthanga chuan Laltanpuia chu taxi fare a dil a, inhnialin an insual zui ta a; Laltanpuia hian a chemte pai (folding) cm. 10-a sei hmangin Chawnghmingthanga áwmah vawi hnih a vit a, Chawnghmingthanga chu a chau zui ta a ni. Hemi hnu hian Laltanpuia chuan Chawnghmingthanga driver seat atanga hnuk sawnin, Lengpui kawng lamah a kalpui ta a, Lengpui thlen hma deuh khamah Chawnghmingthanga ruang chu a paih a, chumi hnuah lêtsanin, Sihhmui daiah a riak ta a ni.

Laltanpuia hian Chawnghmingthanga hi a wallet leh driving licence a laksak a, wallet-ah pawisa a lak hnuah wallet leh licence chu kawng thlangah a paih  a ni.

December 9 zingah Laltanpuia chu taxi dang hmangin Salem Venga an inah a haw a, tlaiah Sihhmuiah chuan kal lehin, a taxi hnutchhiah chu a zuk la a ni. Taxi chu Mualpui hnuaia World Bank road-ah a siam danglam a; taxi-a rawng eng (yellow) chu a khawk a, taxi number pawh la thlain, number dang - MZ-01 E-1817 a bel a, engine number dang a bel bawk.

Laltanpuia hian taxi (a tihdanglam tawh) chu Lalhmangaiha, Tuikual hnenah Rs. 1,35,000-in a hralh a, a hnuah Guwahati-ah Maruti 800 tho, AS-01 G-7116 a lei a; Lalhmangaiha hian Laltanpuia car lei thar chu a duh zawk avangin an inthleng leh a ni. Laltanpuia chuan a motor chan zawk chu Lalramthanga (50) s/o. Lianzuala (L), Ngopa hnenah Rs. 1,30,000-in a hralh leh a, motor document-te erawh a pe tel lo thung.

Police-ten an chhui zui zelna atangin Lalramthanga chu January 10 khan an ko a, motor pawh January 11 khan an laksak nghal. Laltanpuia pawh police-te chuan January 11 khan an man a, an dawpna atangin Chawnghmingthanga thattu a nih thu leh, a ruang a paihna hmunte pawh a puang a ni.

Laltanpuia a inpuan hnu hian police-te chuan January 11, Thawhtanni zan khan ruang chu an zawng nghal a, mahse a paihna hmun chu a khâm deuh avangin, nimin zing khan an la chhuak ta chuah a ni. Chawnghmingthanga ruang lak chhuahnaah hian police, forensic expert, Bungkawn mipui leh taxi driver thahnem tak an kal. A ruang hi endik a nih hnuah nimin khan vui liam a ni.

He pawi khawihnaah hian Aizawl Police Station-ah thubuai, C/No. 9/2010 dt. 11.1.2010 u/s 302/379 IPC (tualthah leh rûkrûk thubuai) ziah luh a ni a, chhui zui ngaite an chhui zui mek. Laltanpuia hi Central Jail-ah a awm mek a; amah hi nupui nei tawh, fa pawh pakhat nei tawh a ni a, mahse a nupui nen hian an inthen tawh.

Central Jail-ah hian nimin khan thuthar lakhawmtu thenkhatin Laltanpuia hi eng eng emaw an zawt a; chuta a insawi dan chuan, Chawnghmingthanga a thah zana chemte a ken chhan chu, Rangvamuala kal a hrât avangin mahni invenna'n tiin a keng. An inhnial buai dan sawiin, nidanga Rangvamuala a kalin taxi fare-ah Rs. 200 a pek thin laiin, Chawnghmingthanga hian Rs. 400 a dil a, an inhnial ta niin a sawi.

Laltanpuia chuan, Chawnghmingthanga a vih hian thisen a far vak lo a, a kawrlum (polar) hâkin a hîp ral a nih a rin thu a sawi a, Chawnghmingthanga ruang chu zan dar 12 velah kawng thlangah a paih thla tih a sawi. Chawnghmingthanga a thah vang hian rilru a hrehawm hle a, a mumangahte pawh a hmuh thin thu a sawi bawk.

Addl. District & Sesions Judge, Pu KL Liana chuan IPC Section 302 hmangin dam chhunga tang tur leh Rs. 3,000 chawi turin chungthu a rel a, Rs. 3,000 hi chawi tur a neih loh chuan thla 6 dang a tan belh ang. Laltanpuia chungthu relna-ah hian sorkar ukil chuan, Laltanpuia hian a thil tih hi a phat loh avangin khaihlum kher lova dam chhung tantir turin court chu a ngen a, Laltanpuia ukil erawh chuan hei aia nepa hrem turin Court chu a dil a, mahse Judge chuan dam chhunga tang tur leh pawisa chawi turin a chungthu hi a rel ta a ni.

Src: Vanglaini