February thlaah VC inthlanna neih a ni dawn

Mizoram District 6-a Village Council 510 leh Local Council 82 dinthar tura inthlanna chu thla thar ni 23-ah vote thlak a ni ang. Hemi chungchanga hriattirna Press Note chu vawiin khan Mizoram State Election Commissioner, Pu C.Ropianga’n Aizawl Press Club-ah a chhuah a, he Press Note chhuah atang hian Political Party leh Candidate te tih tur leh tih loh tur bithliahna Model Code of Conduct chu hman nghal a ni. Press Note chhuah tak ang chuan VC leh Local Council inthlanna neihna tura sorkar hriattirna chu tun thla ni 24-ah chhuah a ni ang a, hemi ni atang hian he inthlannaa chuh duh te tan anmahni Returning Officer theuh te hnenah hming pek luh theih a ni ang a, chuh tumte hming pek luh theih hun hi February ni 1thleng a ni ang a, an hming pek luh te chu February ni 2, chawhma dar

10 leh chawhnu dar 2 inkarah endik a ni ang a, inhnuk dawk leh duh te tan February ni 3, chhun dar 12 thleng hun hawn a ni ang. February ni 3, chawhnu dar 1 leh dar 4 inkarah Candidate te chhinchhiahna (symbols) pek a nih bakah an hming tarchhuah a ni ang a, Ballot paper chhut theih nan Returning Officer zawng zawngte chuan February ni 6-ah an Candidate neihzat hriattirna thuneitute hnenah an theh lut dawn a ni. VC leh Local Council inthlanna atan vote thlak atan hian February ni 23 ruat a ni a, vote thlak zawhfel anih veleh vote tla hi Returning Officer hovin chhiar nghal a ni ang a, result pawh puan nghal a ni ang. Inthlanna felfai tawk lo a awm thulh a vote thlak that ni atan February ni 24 ruat a ni a, inthlanna pumpui hi February ni 27-ah zawh fel vek tur a ni a, February ni 28-ah chuan VC thar leh Local Council thar rorel thei din tawh tur a ni ang.

Election Commission Secretary, Pu P.Lianhrima chuan, Village Council leh Local Council inthlanna tur, District 6, Aizawl, Lunglei, Serchhip, Champhai, Mamit leh Kolasib-ah te Polling Booth 651 a awm niin a sawi a, vote thlak tur reng rengin Electoral Photo Identity Card (EPIC) an keng ngei ngei tur a ni a ti a, EPIC nei lo chuan an nihna ti chiang tur, Passport, Driving Licence leh thil dang an keng tur a ni a ti a, inthlanna muanawm leh felfai a awm theih nan District tinah hian District Magistrate leh District SP-te a tul ang zawng zawng ruahman a, kengkawh turin an hriattir tawh niin a sawi a, inthlanna District 6-a Bawrhsap te chu District Election Officer an ni nghal dawn niin a sawi a, District tinah mamawh dana zirin sorkar Officer-te chu Observer atan ruat an ni ang a ti a, hei bakah hian sorkar hnathawk zawng zawngte chu State Election Commission hnuaiah a tul dana zira thawk vek tura ngaih niin a sawi. Election Commission Secretary chuan, he inthlanah hian EVM hmang lovin ballot box pakhat leh common ballot paper hman a ni ang a ti a, VC inthlan bikah LAD Directorate chu Election Directorate a ni ang a, Local Council inthlan bikah UD&PA Directorate chu Election Directorate a ni dawn niin a sawi a, vote thlak nawn venna atan indelible ink hman a ni leh ang a ti a, Party Worker-te inkara boruak tha pumpelh nan Common Election Camp an buatsaih dawn niin a sawi.

District 6-a VC inthlanna neih turah hian VC 510-a seat 2,118 hnawh khat tura inthlanna neih a ni ang a, chungte chu Aizawl District-a VC 91-a seat 379 hnawhkhah nan te, Lunglei District-a VC 139-a seat 551 atan te, Serchhip District-a VC 44-a seat 192 atan te, Champhai District-a VC 105 atana seat 445 hnawhkhah nan te, Mamit District-a VC 86-a seat 332 atan te leh Kolasib District-a VC 45-a seat 219 hnawhkhahna atan te an ni. Heng district 6-ah te hian vote thlakna tur Polling Station 651 siam a ni ang a, vote thlak thei zat chu 4,06,063 an ni. Aizawl Municipal Council area huam chhunga Local Council 82 inthlanna neih tura seat awmzat chu 524 a ni a, an vote thlakna tur hian Polling Station 174 siamsak an ni ang a, vote thlak thei awmzat chu 1,74,868 an ni.

VC inthlanna leh Local Council inthlanna neih tur atana Model Code of Conduct vawiin atanga hman tan tur hian Political Party te, Candidate te, Minister te, Parliamentary Secretary te, MP, MLA, Councillor, VC member, Local Council member leh sorkar hnathawkte a huam vek a, chi leh chi leh hnam hrang inkara inepna siam zawnga thil tih te, sum leh pai hmanga vote zawn te, mi tihmingchhe zawnga an mimal nun sawichhuah te, campaign-na atan sakhaw biakna hmun hman te leh thildang tam tak khap a ni