Mizoram E-Roll thar ber tih chhuah a ni

Electoral Roll tharah Mizoram puma vote nei chu 6,53,208 an ni a, vote nei zingah mipa aiin hmeichhia 10,120-in an tam. Kumin January ni 1-a kum 18 tlin chin thunna, Mizoram Electoral Roll thar ber, vawiina tihchhuahah chuan mipa vote nei 3,15,773 an ni a, hmeichhia chu 3,31,664 an ni a, heng zingah hian service vote 3,418 a awm a, Roll hman mek lai aiin Roll thar berah hian 12,454-in an tam a, a punna hi za-a 1.94 a ni. Roll thar berah hian a hluia mi 9,422 paih an ni a, paih takte hi mipa 4,727 leh hmeichhia 4,695 an ni. Mizorama Assembly bial 40 zingah Lawngtlai District-a Tuichawng Bialah vote nei an tam ber a, 25,198 an ni a,
Vote tlemna ber chu Lunglei District-a Thorang Bial a ni a, vote nei 12,039 chauh an awm a ni. Electoral Roll thar berah hian mipa 1,000-ah hmeichhia 1,031 awm zel ang an ni a, Polling Station 1,031 a awm a, Polling Station 1,031 zingah Palak Biala Lope-ah vote nei an tlem ber a, mi 29 chauh an ni. Aizawl North III huam chhunga Edenthar Polling Station-ah vote nei an tam ber a, 1,444 an ni a, Lawngtlai West Bial-ah Polling Station a tam ber a, 65 a awm a, a tlemna ber, Aizawl North III-ah chuan Polling Station 15 chauh a awm a ni.