Sorkar thil tih dik loh kan hriatah kan nawr na hle ang: Zoramthanga

10th January : MNF party office, Mizo Hnam Run chu kumin atan nimin khan hawn a ni a; MNF President, Zoramthanga chuan, "Sorkar thil tih dik loh kan hriat chu kan nawr na hle ang," a ti.

MNF office hawnna inkhawm hi Vice President, Dr R Lalthangliana'n a kaihruai a, Rev. Vanlalbela’n hunserh a hmang. Zoramthanga chuan, kum tharah hian an tih dan tha lote kalsan a nih tur thu sawiin, "Mizo Hnam Run, Aizawla mi chauh ni lo, sub-hqrs leh district hqrs. hrang hranga Hnam Run-te chu zu leh ruihhloin a tih buai loh, sual ngampatna hmun a ni lo tur a ni," a ti a; thawhpuite rèl chíng leh phunchiarte'n an sim a ngaih thu a sawi.

Zoramthanga chuan, Congress sorkar thil tih dik lo nasa zawka an tarlan a tul thu sawiin, "Sorkar hnathawkte harsatna pawh chîk zawka kan bihpui a ngai. Kan mipuite

harsatna chi tinrênga hrêk mekte pawh kan vil ngun a tul a, road tax leh tax sang uchuak lutukte hi mipuite hmangaihna avangin kan ngawihbopui mai mai dawn lo, kan do dawn a ni," a ti.

Congress party hi chu chhiatnain a bâwm mek nia sawiin, Zorama chuan, Delhi lam leh Mizoramah an tlahniam chak hle a, kum 2013 inthlannah vote tum an tlem tial tial niin a sawi a; CM Lal Thanhawla chu hna thawkin a office a luahlum khát hle nia sawiin, "Kum kal ta khan khuallianah vawi 97 zet a tang a, kal leh haw nan hun tam a hmang a. Sunday leh Inrinni bakah, sorkar holiday-te belhkhawm phei chuan, CM hian hnathawhna hun a nei meuh lo a tih theih," a ti a, hei vang hian development hna a chak lo niin a sawi.

Zoramthanga chuan, V/C leh Local Council inthlan turah nasa taka inbuatsaih nghal a ngai tih sawiin, "Hnehna chang turin kan thawk ang a, candidate siamah pawh a phûr phûr dah ngawt loin, a tling thei tur kan zawn a ngai. Chutiang chu MLA inthlan huna kan kal dan tur pawh a ni," a ti.

MNF President chuan, kum 2012-ah nasa lehzualin Mizo nationalism an tlangaupui dawn tih sawiin, "Congress hi vai chhûlchhuak, vai nationalism Mizorama tihchak tumtute an ni. MLA candidate pawh an siam thiang lo, an rawt thei chauh a, an pi leh pute thu thuin an awm," a ti. Mizoramah vai nationalism tun din an remtih loh thu sawiin, "Vai sakhua leh Mizote sakhua intluktlang anga thu thehdarh a, kan biak-ina Governor inkhawm leh Pu Hawla te nupa vai pathian bán 10 nei hmaa an puja intluka an puangte kha a rapthlak hle a ni," a ti.

Zoramthanga chuan, kuminah an party policy leh programme an hrual mûm dawn thu sawiin, chutah chuan chaw-a intodelhna tur te, ram hmasawnna hrang hrang ruahmanna a tel thu a sawi bawk.... Src: Vanglaini