Pakistan sorkar buaina kal zelah Defence Secretary Lt.Gen.Naeem Khalid Lodhi chu ban a ni. PM, Yousuf Raza Gilani chuan, sipai hotu hlui, Lt.Gen.Lodhi hi sipai hotute leh sawrkar hotute inkara buaina thlen thei zawnga thu sawi-ah puhin, a chet dan mawi lo leh dan lova thil a tih avangin ban a ni a ti a, a aiawh tur hian Cabinet Secretary ni lai, Nargis Sethi chu ruat nghal a ni. Puan tawh thin angin, President Asif Ali Zardari chuan sipai hotute zingah sawrkar paihthlak tum an awm nia hriain, US-a an palai, Hussain Haqqani chu sorkar chhan tura America
puihna dilna lehkha a ziahtir nia sawi a ni a, heta tang hian Pakistan sawrkar leh sipai inkarah buaina a awm tan a ni. A lehlamah PM, Yousuf Raza Gilani chuan China rama a zinnaah Pakistan sipai hotute leh Intelligence hotute chu ram danpui zah lova thil ti-ah a puh bawk a, hei vang hian sipai hotu, Gen. Ashfaq Kayani leh ISI hotu, Lt.Gen.Ahmed Shuja Pasha chuan sawrkar hotute chu sipaiten thubuai an neih theih nana dik lo taka thil tih tumah puhin Supreme Court-ah an lungawi loh thu an thlen ve leh a ni. Hetianga sipai leh sawrkar hotute inkara buaina a awm lai hian, sawrkar hotute chu ei rute thubuai siamsak an nih theihna tur ngaihthahah Court sang berin a lo puh ve bawk avangin Pakistan sawrkar buaina hi a khirhin a chingchivet hle a, hetianga thil kal vel avang hian eptute chuan sawrkar chu ram danpui zul zuia inthlan buatsaih thuai tawh mai turin an nawr a ni. Hetih lai hian Pakistan President, Asif Ali Zardari chuan vawiin khan Dubai a pan leh ta a, damdawia inenkawl tura zin nia sawi ni mah se, tunlaia an ram sorkar buai rukna, tuna lang chhuak mek nen hian mi tam takin an sawi zawm a, a then chuan mi inneih lawmnaa tel tur niin an sawi bawk a, a engmah a chiang thei lo a, Pakistan politics thlirtute chuan Pakistan ramah hian thil lian tak lang chhuak thuai tur a awm an ring a ni. 
No comments:
Post a Comment